ВАШИНГТОН. /AP/. АНУ-ын MLS (Major League Soccer) лиг болон Мексикийн аварга шалгаруулах тэмцээний багууд оролцож буй “Leagues Cup” тэмцээний хэсгийн шатны тоглолтод “Интер Майами” “Атланта” багийг 4:0-ээр буулган авлаа.
Тоглолт АНУ-ын Флорида муж улсын Форт Лодердейл хотод болсон бөгөөд орон нутгийн цагаар баасан гаргийн 19:30 цагт эхэлжээ.
Гоолуудыг Лионель Месси (тоглолтын 8, 22 дахь минут), Роберт Тэйлор (44, 53 минутад) нар хийжээ. Месси, Тэйлор нар мөн тус бүр нэг гоолын дамжуулалт өгсөн байна.
Месси “Интер Майами” багийн бүрэлдэхүүнд хоёр дахь тоглолтоо хийгээд байгаа юм. Долоодугаар сарын 22-нд аргентин довтлогч Мексикийн “Круз Азуль” багтай хийсэн тоглолтод (2:1) хожлын гоолыг оруулсан билээ.
“Интер Майами” багт шилжинэ гэдгээ Месси зургаадугаар сарын 7-нд зарласан бөгөөд энэ багт 2025 оны улирлыг дуустал тоглох гэрээ байгуулжээ.
“Интер Майами” 2022 оны тавдугаар сараас хойш анх удаа хоёр дараалан хожлоо. Тус баг зургаан оноотой хэсгээсээ нэгдүгээр байрт шалгарч, “Leagues Cup”-ийн хасагдах шатанд шалгараад байна.
Эх сурвалж: МОНЦАМЭ агентлаг
