Хүн төрөлхтний эв найрамдлын бэлгэ тэмдэг болсон, зуны спортын XXXIII наадам 16 хоногийн турш үргэлжилж хөшгөө хаалаа.
Энэ удаагийн Олимпын наадамд дэлхийн 206 орны 10500 тамирчин хурд, хүч, авхаалж самбаагаа сорин өрсөлдөв. Үүнээс АНУ 40 алт, 44 мөнгө, 42 хүрэл буюу нийт 126 медаль хүртсэн амжилтаараа тэргүүллээ. Харин БНХАУ 40 алт, 27 мөнгө, 24 хүрэл медальтайгаар удаалсан бол япончууд 20 алт, 12 мөнгө, 13 хүрэл, нийт 45 медальтайгаар гуравт жагсав. Тэд 20 алтан медалийнхаа 11-ийг нь жүдо, чөлөөт бөхөөс хүртсэн байна. Ялангуяа чөлөөт бөхөөр найман алт, нэг мөнгө, хоёр хүрэл медаль авч онцгойрсон юм. Тэгвэл Австрали болон эзэн орон Франц эхний тавд багтлаа.
Энэхүү Олимпод 10-аас дээш алтан медаль авсан 11 орон байна. Харин Олимпын аваргатай болсон 64 орон бүртгэгджээ. 206 орноос 91 нь ямар нэгэн байдлаар медаль хүртсэн бол 105 орон ганзага хоосон нутаг буцлаа.
Манай улсаас 32 тамирчин өрсөлдөхөд жүдо бөхийн эмэгтэйчүүдийн 48 кг-д олон улсын хэмжээний мастер Б.Баасанхүү мөнгөн медаль хүртэв. Энэ амжилтаараа 74 дүгээрт эрэмбэлэгдлээ. Түүнчлэн жүдогоор гурав, чөлөөт бөхөөр дөрвөн хүн шагналт байрт шалгарчээ.
Эх сурвалж: Улаанбаатар, 2024 оны наймдугаар сарын 12 /МОНЦАМЭ/.
